ԱՐԱ ԳՅՈՒԼԵՐ

Արա Գյուլերը աշխարահռչակ պոլսահայ ֆոտոլրագրող է: Նրան հաճախ դիմում են «Ստամբուլի աչք» մականունով:
Իր գործունեության ընթացքում նա երեք անգամ շրջել է Արևմտյան Հայաստանում և լուսանկարել գրեթե բոլոր բնակավայրերն ու հուշարձանները:
Նա լուսանկարել է բազմաթիվ աշխարհահռչակ անձանց` Ուինսթոն Չերչիլին, Պիկասոյին, Սալվադոր Դալիին, Մարկ Շագալին, Վիլյամ Սարոյանին, Սերգեյ Փարաջանովին, Բրիջիտ Բարդոյին, Սոֆի Լորենին, Ինդիրա Գանդիին և այլոց:
Գյուլերը հարյուրավոր ցուցահանդեսներ է ունեցել ամբողջ աշխարհում, հրատարակել է բազմաթիվ գրքեր: Նրա լուսանկարների մեծ մասը հատուկ հավաքածուով ցուցադրվել է Փարիզում, Բոսթոնում, Չիկագոյում, Նյու Յորքում և այլուր:
Արա Գյուլերն աշխարհի ամենահայտնի 7 լուսանկարիչների շարքում է, նա բազմաթիվ հեղինակավոր մրցանակների է արժանացել, մասնավորապես 2009-ին նրան շնորհվել է «Lucie» մրցանակը, որը լուսանկարչության ոլորտի «Օսկարն» է:

Մեջբերումներ Գյուլերից.

«Լուսանկարչությունն արվեստ չէ, որովհետև երբ լուսանկարն արդեն արված է, դա այն է, ինչ իրականության մեջ կա, իսկ արվեստը ստեղծվում է մարդու երևակայության արդյունքում ու կարող է նաև սուտ լինել»:

«Այո՛, էլի լուսանկարիչ կլինեի, բայց մի բան կա, որի համար միշտ ափսոսում եմ. կուզենայի ճարտարապետ դառնալ, որովհետև ամենակարևորն աշխարհի վրա հետք թողնելն է: Այդ հետքը կարող է լինել նույնիսկ պատը»:

«Ես միշտ վազել եմ երջանկության հետևից, բայց չեմ կարողացել այն ձեռքս վերցնել, ինձ համար երջանկությունն այն է, ինչ ես տեսնում եմ օբյեկտիվի միջից»:

«Լուսանկարչությունն արվեստ չէ , սուտ բան է: Կինոն է արվեստ»:
«Ես սկսել եմ ապրել կինոյով, չգիտեի, որ լուսանկարիչ եմ դառնալու: Լուսանկարչությամբ զբաղվեցի այն ժամանակ, երբ հասկացա, որ դրանով ավելի շատ բան կարող եմ տալ»:

«Ես աշխարհի քաղաքացի եմ: Ես ամբողջ աշխարհի լուսանկարիչն եմ»: